بُعد

حاسه أني بعدت عن الهدف اللي حطيته ل2010 واني سبت السعادة تتسرسب تاني..حاسه أني رجعت ل"العادي" ..أن كل حاجه تبقي عادي ومش فارقه وملهاش لمعه ولا طعم..هو الموضوع ميئوس منه بجد؟ولا أنا اللي بزهق بسرعة؟

رغم أنه كان لفترة قصيرة بس أنا حبيت نفسي وأنا في مود الأنطلاق والثقة...مرجعتش للي كنته قبله_الحمد لله_بس وقفت في مرحله "العادي"

بس مش حاباها..

ومش حابه رغبتي المفاجئة في الأنعزال عن بعض الناس اللي معملوليش حاجة وحشه ...فعلا الفكرة بتلح علي دماغي بشكل ملوش حل بقالها فترة وملهاش سبب منطقي.. وخايفة أزهق من المقاومة وأقلب الترابيزة علشان ارتاح...
هو أنا ليه مش عارفه أعيش وخلاص..ومن غير ما أفكر فأي حاجه..زي كتيييير قوي من البشر اللي عايشين..لا بيفرحو وولا يزعلو من غير ما يكون في سبب واضح وصريح..غير كده عايشين في النص..أنا عايزة أعيش في النص بس من غير لا مبالاة..
ليه التاويل الزايد عن حده للمواقف والذكرايات وليه الرغبة الشبه دائمة في وجود إما مأساة تستحق الحزن الشديد..أو سعادة طاغية من غير مبرر منطقي يخليها تدوم شوية..هو أنا مجنونه مثلا؟؟!!!!!