Sunday, May 23, 2010


"مؤلم أن تكون حياتك فارغة مما يستحق الذكر ..الأشد إيلاماً.. أن يكون

عندك الكثير لتقوله .. عن حياة فارغة ! "

Wednesday, May 12, 2010

 اول امبارح قالي زميلي في الشغل..اللي اكتشف بالصدفة اني بكتب قصص قصيرة واني متوقفة بقالي فترة علشان بلف فنفس الدايرة ومستنية اني اكتب عن حاجة جديدة...بعد نقاش شوية عن الخط اللي بكتب فيه وليه.. قاللي:
"عارفة هاتخرجي امتي؟ لما تلاقي حد"
قالها ببساطة وخرج...
لولا اني فاهمة قصده بجد كنت افتكرته بيلمح لحاجة..وكنت بدأت اطبق معاه الاجراءات التعسفية اللي بتبعها مع اي حد يقرب من الناحية دي...قالها وخرج وسابني مع افكاري..في الاول اتضايقت ان كل الناس بتعرف تقرا جوايا بسهوله كده... وبعدين فكرت ان ده حقيقي جدا...واني انا نفسي فكرت كده كتير قبل كده...بعدها بقي وانا في الطريق للبيت نطت الجملة دي في دماغي..

"I cann't invest my emotions in a MACHINE"

الجملة من فيلم Bicentennial Man

ممكن جدا تكون بعيدة عن الموضوع وغير واقعية كمان... بس كانت في مكانها قوي في الفيلم لمستني بجد...كانت بتحبه بس رفضت تستمر في الحب ده لانه انسان الي..حتى لو كان عنده مشاعر واحاسيس...قالتها له ببساطة وهي بتعزمه علي فرحها...ليه الجملة دي بالذات مع الموقف ده؟ مش عارفة...آه هو أنا فعلا محبتش إنسان آلي قبل كده..بس انا عارفة اني مبستثمرش مشاعري صح...بستهلكها على اطلال حاجات خلصت من زمان...او تخيلات لحاجات محصلتش اصلا.. او حتى احتياج للحب وخوف منه... وبحول كل الطاقة اللي جوايا لتدمير اي بدايات جوايا ناحية اي حد..عارفة اني قافلة علي قلبي قوي...ومبسمحش لحد يقرب منه... الناس اللي حواليا شايفين ان مفيش منطق يبرر اني افضل "كده" كل الوقت ده...حتى اللي يعرفوا منهم الحدوتة اياها...حاسين ان سنين الجرح طولت اكتر من اللازم...ومش بيصدقوني لو قلت اني تخطيت الموضوع ده بالفعل من زماااان ..وان الفكرة بس اني مش عارفة الاقي المفتاح من تاني...مع شوية عقد قديمة ضخمها الخوف ...

عايزة اخرج من الدايرة وعايزة اتخلص من الاكتئاب المزمن والزهق الدائم...عايزة اتغير للي مش عارفاه بالظبط بس متأكده انه هايكون احسن...بس برضه مش عايزة ده يحصل لما "الاقي حد"..مش عايزة ده يرتبط بحد لو مشي ياخد كل ده معاه....عايزة اعتمد علي نفسي ولنفسي..علشان لما الاقيه اكون بحبني قبل ما هو يعمل ده...اعرف انا واقفة فين كويس قبل ما اطلب من حد او اسمح له انه يكمل مشواري معايا...عايزة اتأكد اني ممكن اتقبل ان حد يكمل مشواري معايا ..اتاكد اني مش هازهق قبل ما هو يزهق..او اني اطبق معاه سياستي الدفاعيه اللي بتخليني اجرح الناس وابعد عنهم واحط حدود وخطوط قبل ما هما يسبقوني ويعملوا حاجة من دي...


عايزة اتاكد الاول اني استاهل ان حد يختارني علشان اكمل معاه مشواره قبل ما افكر هو يستاهلني ولا لا...

Thursday, May 6, 2010

أقرار

اعترف وانا بكامل قواي العقلية اني....

مش فاهمة!!

يعني إن واحدة تيجي تحكيلي إنها متضايقة من زميلتها وتشتكي منها مر الشكوي وأول ما تشوفها الكلام يتقطع بابتسامة عريضة وهزار لا يصلح الا لكونه مع أقرب الصديقات!!
وأنها بعد ما تمشي تيجي زميلتها نفسها ويتكرر نفس المشهد والموقف اللي اشتكت منه الاولانيه يتحول لموقف تاني خالص هي فيه الطرف المظلوم!!
وأني رغم أني حاولت قدر جهدي مراعاة لحق زمالتهم عليا وأكراما لطلبهم لرأيي إني أقترح حلول عملية لمشاكل بتواجههم مع بعض بحيث الموقف يتحل ومحدش يزعل من التاني الا أني الأقي نفسي متهمة من طرف تالت أني بقومهم علي الطرف التالت وأني بشيع كلام باطل عنهن!!
وأني لما أخد موقف من التلاته وأبطل اتكلم معاهم يكون تفسير الموقف ده اني خفت من السلطه المزعومة لاحدهن وانه اصلا واساسا يعني "مش من حقي " ازعل من الكلام اللي اتقال علي لساني ومليش يد فيه!!
لا وايه بقي كمان كل ما اطلب حاجة ليها علاقة بالشغل تتأخر عادي رغم أنها مهامهم يعني وهما اللي بيعملوها ولما اتكلم يتنفخ في وشي ويبرطموا وكده يعني!!!


لذا..أقر وأنا في كامل قواي العقلية:

أن لو أن كل البنات دماغها كده...فأنا مش عايزة أصاحب بنات تاني !!!

و أن لو كان تعريف" الاجتماعية " الحديثة هو الرغي الي علي الفاضي والــ فاضي برضه في كل الاتجاهات ومع كل الناس وبوشوش كتير فأنا مش عايزة أكون أجتماعية!!!

بجد زهقت...

Sunday, May 2, 2010

حملة 30 يوم من التدوين

رغم ان آية عرفتني عليها ورغم انها حاولت تشجعني اني اشترك انا كمان...رغم اني كنت عايزة اشترك..ومشتاقه اني اكتب ومشتاقه الاقي الناس حواليا في التعليقات زي ما شفت كده عند الناس اللي اشتركت ...ورغم اني يمكن لو حاولت اعرف اشترك..بس انا حاسه اني مش قد التزام زي ده...رغم اني مش هاخسر حاجة لو اشتركت ومكملتش..مش هاخسر غير اني هاحطها علي قايمة الحاجات اللي تحمستلها ومكملتهاش..القايمة اللي حجمها المتزايد بيوجعني...بس جبني وهروبي بيوجعوني برضه!!ا