اول امبارح قالي زميلي في الشغل..اللي اكتشف بالصدفة اني بكتب قصص قصيرة واني متوقفة بقالي فترة علشان بلف فنفس الدايرة ومستنية اني اكتب عن حاجة جديدة...بعد نقاش شوية عن الخط اللي بكتب فيه وليه.. قاللي:
"عارفة هاتخرجي امتي؟ لما تلاقي حد"
قالها ببساطة وخرج...
لولا اني فاهمة قصده بجد كنت افتكرته بيلمح لحاجة..وكنت بدأت اطبق معاه الاجراءات التعسفية اللي بتبعها مع اي حد يقرب من الناحية دي...قالها وخرج وسابني مع افكاري..في الاول اتضايقت ان كل الناس بتعرف تقرا جوايا بسهوله كده... وبعدين فكرت ان ده حقيقي جدا...واني انا نفسي فكرت كده كتير قبل كده...بعدها بقي وانا في الطريق للبيت نطت الجملة دي في دماغي..
"I cann't invest my emotions in a MACHINE"
الجملة من فيلم Bicentennial Man
ممكن جدا تكون بعيدة عن الموضوع وغير واقعية كمان... بس كانت في مكانها قوي في الفيلم لمستني بجد...كانت بتحبه بس رفضت تستمر في الحب ده لانه انسان الي..حتى لو كان عنده مشاعر واحاسيس...قالتها له ببساطة وهي بتعزمه علي فرحها...ليه الجملة دي بالذات مع الموقف ده؟ مش عارفة...آه هو أنا فعلا محبتش إنسان آلي قبل كده..بس انا عارفة اني مبستثمرش مشاعري صح...بستهلكها على اطلال حاجات خلصت من زمان...او تخيلات لحاجات محصلتش اصلا.. او حتى احتياج للحب وخوف منه... وبحول كل الطاقة اللي جوايا لتدمير اي بدايات جوايا ناحية اي حد..عارفة اني قافلة علي قلبي قوي...ومبسمحش لحد يقرب منه... الناس اللي حواليا شايفين ان مفيش منطق يبرر اني افضل "كده" كل الوقت ده...حتى اللي يعرفوا منهم الحدوتة اياها...حاسين ان سنين الجرح طولت اكتر من اللازم...ومش بيصدقوني لو قلت اني تخطيت الموضوع ده بالفعل من زماااان ..وان الفكرة بس اني مش عارفة الاقي المفتاح من تاني...مع شوية عقد قديمة ضخمها الخوف ...
عايزة اخرج من الدايرة وعايزة اتخلص من الاكتئاب المزمن والزهق الدائم...عايزة اتغير للي مش عارفاه بالظبط بس متأكده انه هايكون احسن...بس برضه مش عايزة ده يحصل لما "الاقي حد"..مش عايزة ده يرتبط بحد لو مشي ياخد كل ده معاه....عايزة اعتمد علي نفسي ولنفسي..علشان لما الاقيه اكون بحبني قبل ما هو يعمل ده...اعرف انا واقفة فين كويس قبل ما اطلب من حد او اسمح له انه يكمل مشواري معايا...عايزة اتأكد اني ممكن اتقبل ان حد يكمل مشواري معايا ..اتاكد اني مش هازهق قبل ما هو يزهق..او اني اطبق معاه سياستي الدفاعيه اللي بتخليني اجرح الناس وابعد عنهم واحط حدود وخطوط قبل ما هما يسبقوني ويعملوا حاجة من دي...
عايزة اتاكد الاول اني استاهل ان حد يختارني علشان اكمل معاه مشواره قبل ما افكر هو يستاهلني ولا لا...