Monday, May 19, 2014

The truth..

Build as many walls as you want..
Wear as many masks as you'd like..
You may cover it for a while but you'll never change the truth..
Deny it...keep denying maybe you will believe yourself one day.

سو كيووت

فجأة وزي أفلام الكارتون بتنور فوق دماغي لمبة مكتوب فيها
"you are not nice"
 ده في حد ذاته مش اكتشاف خطير خالص.. إطلاقًا.. أنا أصلًا بذلت مجهود خرافي عشان أبقى" شريرة".. عشان أتعلّم أرد على كل حاجة حد يقولها وتضايقني، بدل ما أقعد أحرق في دمي وأفكر إني كان لازم أقول كذا وكذا وكذا.. كمان أنا كنت في كامل قوايا العقلية وأنا ببعد بعض الناس عني وببعد نفسي عنهم، عشان أحافظ لنفسي على أي مخزون طاقة فاضل، بعد اللي بيُستنزف غصب عننا في الحياة اليومية، أعمل بيه حاجة مفيدة.. أصل العلاقات مع الناس أكتر حاجة بتسحب من بطاريات الروح على فكرة.

المهم بقى وأنا بتفرج على:
(My best friend's wedding)
في آخر الفيلم لما البطل اختار(كاميرون دييز) رغم إنه كان بيحب
 (جوليا روبيرتس) من سنين ومن قبل ما يعرف كاميرون أصلًا، نورت اللمبة في دماغي. أنا عارفة إن معظم الرجالة لو اتحطوا في المكان ده هيختاروا كاميرون، مش بس عشان جمالها أوضح من جمال جوليا، لا علشان هي
"nice وcute"

السؤال بقي: إيه هي ضوابط اللطف؟ يعني إيه اللي يخلي اللي تسامح حد حاول يخرب حياتها، أحسن من اللي ترفض وجود الحد ده في حياتها! ويسحب بقى طاقتها ويغرّقها طاقة سلبية؟ إيه اللي يخلي واحدة بتعمل كل اللي زمايلها في الشغل بيرموه عليها من مهام متخصّهاش، وهمّ كسلانين أو مستكبرين يعملوها، أحسن من اللي بتحط حدود وتجبر الناس تحترمها؟ إيه اللي يخلي واحدة مبتطالبش بحقها في أي حاجة وبتستني لحد ما حد تاني يجيبهولها، أحسن من المبادرة اللي مبتسمحش لحد يهدر حقوقها؟

كل دول بيتقال عليهم لطاف، على عكس التانيين اللي بيتكرهوا وبيتقال عليهم متعجرفين وشايفين نفسهم وظالمين أحيانًا. أنا مش عايزة أكون "بنت لطيفة"، لو تعريف اللطف ده إني أتحطّ في أي مكان وميبقاش ليّ أي تأثير ولا آخد اللي شايفاه حقي.

بس برضو بحس بالظلم لما بلاقي نفسي -قبل الناس- حاطاني في قالب الشريرة، أنا بقول دايمًا إني معنديش مشكلة إطلاقًا ألعب دورالـ 
"bad guy "
لو ده اللي هيجيبلي حقي، بس ليه أصلًا معرفش آخد حقي غير كده؟! ليه الناس التانية متراعيش حقوق غيرها من غير ما تدفعهم إنهم يستخدموا ضوافرهم وأنيابهم عشان يحسوا بالإنصاف؟ هو ممكن يُعتبر إنصاف لو خدته بالعافية؟ 

أسئلة وجودية معتقدش هيكون لها إجابة للأسف، بس لو رجعنا للفيلم وقررت أختار شخصية من الاتنين، فأنا هختار جوليا، أصلها هي اللي كسبت في الآخر برضو.. آه خسرت حب عمرها، بس التانية خسرت دراستها ومسستقبلها المهني واختياراتها كلها تقريبًا..
"she is nice"
بس ده مكسّبهاش غير راجل هيفضل يحبها طول ما هي مطيعة ولطيفة ورهن إيديه.. في نفس الوقت في جزء جوايا وناس كتير، بيقولوا إني لو كان الاختيار بإيدي كنت هختار أكون كاميرون، عشان أحس إني اختيار حد..العقدة الازلية  
To be someone's first choice..
 ممممم.. مش عارفة، وهرجع تاني للأسئلة الوجودية، اللي من عيّنة: وليه ميختارنيش وأنا قوية وعارفة حقوقي وبحاول آخدها لنفسي؟

http://www.nooun.net/article/953/