بالظبط في الوقت اللي قلت فيه ان كل حاجة بقت تمام...اني اقدر اقول اني كويسة وسليمة ومفيش حاجة تستاهل الحزن...في الوقت اللي صالحني فيه الرضا...بالظبط في اللحظة دي قلبت الترابيزة وكل الاحلام اللي عليها وشويه الرضا اللي جمعتهم بصعوبة...
كل مرة اقول خلاص مبقتش فارقة معايا...وفعلا ده بيبقي احساسي بجد...مش فارقة...هاصالحها لاني لازم اصالحها مش لاني عايزة....هاتعايش مع الموقف ولو معرفتش انساه اهو هايتحط بقي علي كتلة المواقف السابقة اللي اثبتت مع الوقت انها غير قابله للتحلل بل بالعكس...
الغريب بقي انه بيبقي فارق ومش فارق في اللحظة نفسها...موجوعه ومنهارة وبعيط... بس مش عايزة اصالحها وفي نفس الوقت بسعي لده بالحاح غريب..و مش عايزة الوقت يطول...
المرة دي انا غلطانه...مش من البداية ...بس يعني لما ركزت وحاولت تلاقي اسباب لرغبتها المفاجئة انها متكلمنيش...وبعد يومين من الخصام..عرفت تجيب اسباب انا غلطانه فيها فعلا...انا عندي مبرراتي طبعا بس هي مش شايفاها ومعتقدش انها هاتشوفها في يوم من الايام...
قلبي اسود...وقلبها هي كمان من ناحيتي...صعب يتحل الاشكال اللي بينا واحنا الاتنين مبننساش لبعض...بنتخانق ونتصالح لكن مبننساش...انا مبنساش انها ظلمتني...ولا انها عاملتني وحش طول عمري تقريبا...وانها كتير قالت صراحة وتلميح ومن خلال مواقف اني "غير مرغوب فيا"...وهي مبتنساش رد فعلي علي المعاملة دي...و انعزالي اللي بيقوي كل يوم...استقلالي بغرفتي وافكاري خارج نطاق سيطرتها...وعدم رغبتي في المشاركة او المساعدة في اي حدث يتخطي حدود عالمي/غرفتي...
بفكر اذا كان اللي مضايقني انها شايلاني من حساباتها فيما يتعلق بالحقوق اللي ليا عندها وحاطاني بعنف في الواجبات...واللي مضايقها اني مقصرة في واجبات مش قادرة اعملها لغياب حقوقي... ياتري يبقي الحل في بساطة عملية حسابية زي الجمع والطرح...مهو ياتحطني في الحقوق يا تشيلني من الواجبات...عملية جمع او طرح بسيطة ومفيهاش اي تعقيد...
بس السؤال الاهم بقي هو لو اتحقق ده ياتري هابقي مبسوطة؟؟!ا