اول امبارح قالي زميلي في الشغل..اللي اكتشف بالصدفة اني بكتب قصص قصيرة واني متوقفة بقالي فترة علشان بلف فنفس الدايرة ومستنية اني اكتب عن حاجة جديدة...بعد نقاش شوية عن الخط اللي بكتب فيه وليه.. قاللي:
"عارفة هاتخرجي امتي؟ لما تلاقي حد"
قالها ببساطة وخرج...
لولا اني فاهمة قصده بجد كنت افتكرته بيلمح لحاجة..وكنت بدأت اطبق معاه الاجراءات التعسفية اللي بتبعها مع اي حد يقرب من الناحية دي...قالها وخرج وسابني مع افكاري..في الاول اتضايقت ان كل الناس بتعرف تقرا جوايا بسهوله كده... وبعدين فكرت ان ده حقيقي جدا...واني انا نفسي فكرت كده كتير قبل كده...بعدها بقي وانا في الطريق للبيت نطت الجملة دي في دماغي..
"I cann't invest my emotions in a MACHINE"
الجملة من فيلم Bicentennial Man
ممكن جدا تكون بعيدة عن الموضوع وغير واقعية كمان... بس كانت في مكانها قوي في الفيلم لمستني بجد...كانت بتحبه بس رفضت تستمر في الحب ده لانه انسان الي..حتى لو كان عنده مشاعر واحاسيس...قالتها له ببساطة وهي بتعزمه علي فرحها...ليه الجملة دي بالذات مع الموقف ده؟ مش عارفة...آه هو أنا فعلا محبتش إنسان آلي قبل كده..بس انا عارفة اني مبستثمرش مشاعري صح...بستهلكها على اطلال حاجات خلصت من زمان...او تخيلات لحاجات محصلتش اصلا.. او حتى احتياج للحب وخوف منه... وبحول كل الطاقة اللي جوايا لتدمير اي بدايات جوايا ناحية اي حد..عارفة اني قافلة علي قلبي قوي...ومبسمحش لحد يقرب منه... الناس اللي حواليا شايفين ان مفيش منطق يبرر اني افضل "كده" كل الوقت ده...حتى اللي يعرفوا منهم الحدوتة اياها...حاسين ان سنين الجرح طولت اكتر من اللازم...ومش بيصدقوني لو قلت اني تخطيت الموضوع ده بالفعل من زماااان ..وان الفكرة بس اني مش عارفة الاقي المفتاح من تاني...مع شوية عقد قديمة ضخمها الخوف ...
عايزة اخرج من الدايرة وعايزة اتخلص من الاكتئاب المزمن والزهق الدائم...عايزة اتغير للي مش عارفاه بالظبط بس متأكده انه هايكون احسن...بس برضه مش عايزة ده يحصل لما "الاقي حد"..مش عايزة ده يرتبط بحد لو مشي ياخد كل ده معاه....عايزة اعتمد علي نفسي ولنفسي..علشان لما الاقيه اكون بحبني قبل ما هو يعمل ده...اعرف انا واقفة فين كويس قبل ما اطلب من حد او اسمح له انه يكمل مشواري معايا...عايزة اتأكد اني ممكن اتقبل ان حد يكمل مشواري معايا ..اتاكد اني مش هازهق قبل ما هو يزهق..او اني اطبق معاه سياستي الدفاعيه اللي بتخليني اجرح الناس وابعد عنهم واحط حدود وخطوط قبل ما هما يسبقوني ويعملوا حاجة من دي...
عايزة اتاكد الاول اني استاهل ان حد يختارني علشان اكمل معاه مشواره قبل ما افكر هو يستاهلني ولا لا...
7 comments:
انا مش عارفة بالضبط ايه اللي وجعني ف الكلام ..
و لا انا اللي بتلكك ع الوجع النهاردة ...
مش عارفة
بس هاجي اعلق بعدين بقى عشان عايزة اقولك حاجة .. حاجات
أولا سلامتك من الوجع
ثانيا مستنية حاجاتك الكتير
;)
أولاً وحشتيني
ثانيًا تدويناتك الأخيرة "ممتعة" بالنسبة لي جدًا رغم مرارتها، بيتهيألي إن المشكلة إننا كسولين شوية، شايفين المشكلة وحاطين إيدينا على أسبابها وبالفعل قدرنا نعالج أجزاء كتير قوي منها وعارفين نتخلص من الباقي إزاي لكن... "الخوف" بيمنعنا، سواء كان خوف من التغيير ولا خوف من تكرار الجرح ويمكن ساعات الخوف من الفرحة.
صدقي نفسك قوي وحبيها، جميل إنك تبقي عايزة تعتمدي على نفسك بس برضو أحيانًا بنحتاج "حد" يسندنا ويفرح باعتمادنا على نفسنا، إنسي خوفك وفكري في كل الحاجات الجميلة اللي جواكي ومش شايفاها، ساعتها هتتأكدي إنك تستحقي كتييييييير قوي وناس كتير تتمني إن شريك مشوارها يكون بنفس صفاتك الجميلة.
طولت عليكي ويمكن أكون بأكلمني أكتر ما بأكلمك
كلمة أخيرة: لازم نحب نفسنا أكتر شوية
مروة
متعرفيش قد ايه تعليقك اسعدني
ربنا يخليكي ويسعدك
:)
شروق :
شوفى يا جميلة دى أول مرة آجى هنا المدونة بتاعتك ..وعجبنى فيها حاجات كتير
أولا عجبنى ثقافتك الادبيه العاليه وده فى حد ذاته شئ انا بحبه
ثانيا عجبنى انك بتعبرى عن نفسك وبتقولى اللى جواكى وده فى منتهى الصدق
عجبنى انك بتحطى المشكله والحل فى بوست واحد
بالنسبه للبوست ده
ف البراجراف ده بالذات "وجعنى اوى "
"عايزة اخرج من الدايرة وعايزة اتخلص من الاكتئاب المزمن والزهق الدائم...عايزة اتغير للي مش عارفاه بالظبط بس متأكده انه هايكون احسن...بس برضه مش عايزة ده يحصل لما "الاقي حد"..مش عايزة ده يرتبط بحد لو مشي ياخد كل ده معاه....عايزة اعتمد علي نفسي ولنفسي..علشان لما الاقيه اكون بحبني قبل ما هو يعمل ده...اعرف انا واقفة فين كويس قبل ما اطلب من حد او اسمح له انه يكمل مشواري معايا...عايزة اتأكد اني ممكن اتقبل ان حد يكمل مشواري معايا ..اتاكد اني مش هازهق قبل ما هو يزهق..او اني اطبق معاه سياستي الدفاعيه اللي بتخليني اجرح الناس وابعد عنهم واحط حدود وخطوط قبل ما هما يسبقوني ويعملوا حاجة من دي...
عايزة اتاكد الاول اني استاهل ان حد يختارني علشان اكمل معاه مشواره قبل ما افكر هو يستاهلني ولا لا...)"
شوفى بقى ...كلام زميلك صح
انتى عايزة حد قريب منك اوى اوى اوى ترمى عليه بهمومك وتحتويه بحنانك ويدخل لون جديد لحياتك
ساعتها هتحسى ان للحياه طعم مختلف
:):):)
انا مبسوطة انى جيت هنا وعرفتك
وهتبسط اكتر لما تنورينى عندى فى المدونة بتاعتى
هستنااااااااااااااكى
هبة
منورة يا جميلة
اتمني متكنش اخر زيارة
اكيد هازور مدونتك ان شاء الله
تعرفى انه مش شرط خالص انك تقابلى حد عشان تخرجى من الدايرة دى..
انا فى الدايرة دى بقالى فترة من ساعة ما قابلت واحده...ومش عارف اخرج من الدايرة at all
Post a Comment